மிசிசாகா நெடுஞ்சாலை 401 வியாழக்கிழமை காலைநடந்த விபத்தில் லொறி ஒன்று கவிழ்ந்து சாரதி உயிரிழந்த சம்பவம் சோகத்தை ஏற்படுத்தியுள்ளது.
.நெடுஞ்சாலை 401 இல் ஏற்பட்ட டேங்கர் லொறி விபத்து காரணமாக அப்பகுதியில் போக்குவரத்து நெரிசல் ஏற்பட்டுள்ளது.
இந்த விபத்து வின்ஸ்டன் சர்ச்சில் பவுல்வர்டுக்கும் (Winston Churchill Boulevard) மிசிசாகா சாலைக்கும் (Mississauga Road) இடையே சுமார் காலை 10:20 மணியளவில் நிகழ்ந்தது.
அபாயகரமான பொருட்களை ஏற்றிச் சென்ற வணிக டேங்கர் லொறி ஒன்று நெடுஞ்சாலை 401 இன் கான்கிரீட் தடுப்பு சுவரில் எதிர்பாராத விதமாக மோதியுள்ளது.
இந்த கோர விபத்தில் டேங்கர்லொறியின் ஓட்டுநர் சம்பவ இடத்திலேயே உயிரிழந்தார். வாகனத்தில் அவர் மட்டுமே தனியாக பயணித்ததாக OPP சார்ஜென்ட் கெர்ரி ஷ்மிட் தெரிவித்தார்.
விபத்துக்கான சரியான காரணம் தற்போது வரை கண்டறியப்படவில்லை என்றும், இது குறித்து தீவிர விசாரணை நடைபெற்று வருவதாகவும் அவர் குறிப்பிட்டார்.
டேங்கர் லொறியில் இருந்து கசிவு ஏற்பட்டிருக்கக்கூடிய அபாயகரமான பொருட்களை கையாளுவதற்காக அவசர கால மீட்பு படையினர் விரைந்து வந்தனர்.
