ஆக்ஸ்போர்டுஷையரில் உள்ள M40 வடக்கு நோக்கிச் செல்லும் பாதையில் பைசெஸ்டரில் உள்ள சந்திப்பு 9க்கும் பேனார்ட்ஸ் கிரீனில் உள்ள சந்திப்பு 10க்கும் இடையில் இரண்டு பாதைகள் மூடப்பட வேண்டிய கட்டாயம் ஏற்பட்டது.
சம்பவயிடத்திற்கு வரவழைக்கப்பட்ட பொலிசார், லொறிக்குள் பலர் பதுங்கியிருப்பதாக குறிப்பிட்டனர். இதனையடுத்து சோதனையிட்ட பொலிசார், அந்த லொறிக்குள் இருந்து பலரை மீட்டனர். பொலிசார் வெளியிட்டுள்ள தகவலில் 13 பேர்கள் அந்த லொறிக்குள் பதுங்கியிருந்ததாக குறிப்பிட்டுள்ளனர்.
குடிவரவு குற்றங்களில் ஈடுபட்டதாக சந்தேகத்தின் பேரில் அதிகாரிகள் சாரதியையும் கைது செய்தனர். இந்த நிலையில், விசாரணை தொடர்வதால், உள்விவகார அலுவலகத்துடன் இணைந்து பணியாற்றி வருவதாக Thames Valley பொலிசார் தெரிவித்துள்ளனர்.
இதனிடையே, காவல்துறையினர் தலைமையிலான ஒரு சம்பவத்தைத் தொடர்ந்து அவசர சேவைகள் உடனிருந்ததை அடுத்து இந்த சாலை மூடல் ஏற்பட்டதாக தேசிய பிரதான சாலைகள் முன்னதாக தெரிவித்தன.
Thames Valley பொலிசார் தெரிவிக்கையில், இன்று காலை 9.53 மணிக்கு M40 இல் 9 மற்றும் 10 சந்திப்புகளுக்கு இடையில் பயணித்த லொறியின் பின்புறத்தில் பலர் இருப்பதாக எங்களுக்கு தகவல் கிடைத்தது.
அந்த வாகனம் தடுத்து நிறுத்தப்பட்டு 13 பேர் கைது செய்யப்பட்டனர். குடிவரவு குற்றச் செயல்களில் ஈடுபட்டதாக சந்தேகத்தின் பேரில் சாரதி கைது செய்யப்பட்டார். M40 என்பது லண்டன், ஆக்ஸ்போர்டு மற்றும் பர்மிங்காம் ஆகியவற்றை இணைக்கும் ஒரு முக்கிய மோட்டார் பாதையாகும்.
