Tornado tears through French village: பிரெஞ்சு கிராமம் ஒன்றை மொத்தமாகப் புரட்டிய சூறாவளி.

பிரெஞ்சு கிராமம் ஒன்றை சூறாவளி தாக்கியதில், டசின் கணக்கானோர் காயமடைந்ததுடன் நூற்றுக்கணக்கான வீடுகளும் சேதமடைந்துள்ளன.

தென்மேற்கு பிரான்சில் உள்ள ஒரு கிராமத்தை சூறாவளி தாக்கியதில் சுமார் 41 பேர் காயமடைந்தனர். பிரெஞ்சு அதிகாரிகள் நாட்டின் தென்மேற்குப் பகுதியின் பெரும் பாகங்களுக்கு புயல் அபாய ஆரஞ்சு எச்சரிக்கை விடுத்திருந்ததால், பல பகுதிகளில் மின்வெட்டும் போக்குவரத்து குழப்பமும் ஏற்பட்டன.

போமாஸ் கிராமமே மிகக் கடுமையாகப் பாதிக்கப்பட்டது, அங்கு சுமார் 300 வீடுகள் சேதமடைந்தன. சுமார் 1,000 மக்கள்தொகை கொண்ட அந்த கிராமத்தில் சூறாவளியால் சில வீடுகளின் கூரைகள் பெயர்த்துப் போயின.

வீட்டின் ஒரு பகுதி இடிந்து விழுந்ததில் காயமடைந்தவர்களில் கர்ப்பிணிப் பெண்ணும் ஒருவர். காயமடைந்தவர்களில் பதினைந்து பேர் மருத்துவமனைக்குக் கொண்டு செல்லப்பட்டுள்ளனர்.

ஆட் பிராந்தியத்தில் உள்ள ஒரு பிரெஞ்சு நகரில், சூறாவளி பெரிதாக வளர்ந்து மண்ணைக் கிளப்புவதை திகைக்க வைக்கும் காணொளிக் காட்சிகள் காட்டுகின்றன.

120க்கும் மேற்பட்ட அவசரக்காலப் பணியாளர்கள் சம்பவ இடத்திற்கு அனுப்பப்பட்டதாக உள்ளூர் அதிகாரிகள் தெரிவித்தனர். இரவு முழுவதும் பாதிக்கப்பட்ட பகுதிகளில் காவலர்கள் ரோந்துப் பணியில் ஈடுபட்டிருந்தனர்.

அதேவேளையில், தங்கள் வீடுகளில் தங்க முடியாத குடியிருப்பாளர்களுக்காக போமாஸ் மற்றும் லிமூக்ஸ் ஆகிய இடங்களில் தலா ஒரு தங்குமிடமும், மற்ற இரண்டு தங்குமிடங்களும் திறக்கப்பட்டன.

மரங்கள் மற்றும் கார்கள் வீதிகளில் சிதறிக் கிடந்ததால் பல சாலைகள் மூடப்பட்டன. இதனிடையே ஆட் பிராந்தியத்தில் ஆலங்கட்டி மழையும் பெய்துள்ளது.

அருகிலுள்ள பகுதிகளில் 3 முதல் 5 செ.மீ வரை அளவுள்ள ஆலங்கட்டிகள் விழுந்ததாகவும் தெரிவிக்கப்பட்டுள்ளது. மேலும், அருகிலுள்ள Arquettes-en-Val கிராமத்தில் காற்றின் வேகம் மணிக்கு 73 மைல்கள் வரை எட்டியதாக தேசிய வானிலை ஆய்வு மையம் தெரிவித்தது.

தெற்கு பிரான்ஸ் முழுவதும் வீசிய புயல்கள் போக்குவரத்து கட்டமைப்பைச் சீர்குலைத்தன; இதனால் ரயில்கள் தாமதமடைந்தன, சாலைகள் மூடப்பட்டன, மேலும் போர்டோ, மார்சேய், நீஸ், டுலூஸ் மற்றும் வடக்கே உள்ள பாரிஸ் ஆகிய நகரங்களின் விமான நிலையங்களிலும் விமானச் சேவைகளில் தாமதங்களும் ரத்துகளும் ஏற்பட்டன என்று போக்குவரத்து அமைச்சர் பிலிப் டபரோட் தெரிவித்தார்.

புயல் காரணமாக பத்து கிராமங்களில் சுமார் 2,800 வீடுகளில் மின்சாரம் துண்டிக்கப்பட்டதாகவும் அதிகாரிகள் தெரிவித்தனர்.