அமெரிக்காவின் லாஸ் ஏஞ்சல்ஸ் நகரில் நடந்த துப்பாக்கி சூடு சம்பவத்தில் 7 பேர் காயமடைந்து உள்ளனர்.
அமெரிக்காவில் துப்பாக்கி சூடு கலாசாரம் பெருகி வரும் சூழலில் அதற்கு எதிரான நடவடிக்கையை எடுக்க அதிபர் பைடன் தலைமையிலான அரசு முயற்சிகளை மேற்கொண்டு வருகிறது.
இந்த நிலையில், அந்நாட்டின் லாஸ் ஏஞ்சல்ஸ் நகரில் பூங்கா பகுதியில் நடந்து வந்த கார் கண்காட்சி ஒன்றில் மக்கள் அதிக அளவில் கூடியிருந்தனர். அவர்களை நோக்கி திடீரென துப்பாக்கி சூடு நடத்தப்பட்டு உள்ளது.
இதுபற்றி லாஸ் ஏஞ்சல்ஸ் நகர போலீசார் கூறும்போது, லாஸ் ஏஞ்சல்சின் சான் பெட்ரோ பகுதியருகே உள்ள பெக் பூங்காவில் துப்பாக்கி சூடு நடந்துள்ளது. மொத்தம் 7 பேர் காயமடைந்து உள்ளனர். அவர்களில் 2 பேர் தீவிர சிகிச்சை பெறும் நிலையில் உள்ளனர் என தெரிவித்து உள்ளனர்.
எங்களுடைய நுண்ணறிவு பிரிவினர் பெக் பூங்காவில் சம்பவ பகுதியில் தொடர்ந்து பணியாற்றி வருகின்றனர். பொது பாதுகாப்புக்கு எந்தவித இடையூறும் தற்போது இல்லை. பூங்காவானது தொடக்க கட்ட விசாரணை நிறைவடையும் வரை சில மணிநேரம் வரை தொடர்ந்து மூடப்பட்டு இருக்கும் என்றும் தெரிவித்து உள்ளனர்.
