அமெரிக்க ஜனாதிபதி டொனால்ட் ட்ரம்புடன் தொலைபேசியில் உரையாடியதாக கனடப் பிரதமர் மார்க் கார்னி (Mark Carney) தெரிவித்துள்ளார்.
அமெரிக்க வாகனங்கள், பால் பொருட்கள் மற்றும் மதுபானங்களுக்கு கனடாவில் சமமற்ற உரிமை வழங்கப்படுவதாகக் கூறி, கனடாவில் இருந்து இறக்குமதி செய்யப்படும் பரந்த அளவிலான பொருட்கள் மீது 50 சதவீத வரியை ட்ரம்ப் விதித்துள்ளார்.
ஒயின் மற்றும் ஹாக்கி மட்டைகள் போன்ற அன்றாட நுகர்பொருட்கள் மற்றும் சிமெண்ட் போன்ற தொழில்துறை பொருட்கள் இந்த புதிய வரி விதிப்புப் பட்டியலில் சேர்க்கப்பட்டுள்ளன.
இருப்பினும், எரிபொருள், பொட்டாஷ், முக்கிய கனிமங்கள் மற்றும் மீன் வளங்கள் போன்ற சில பிரதான ஏற்றுமதிப் பொருட்களுக்கு இந்த வரி விதிப்பிலிருந்து விலக்கு அளிக்கப்பட்டுள்ளது.
இந்தத் திடீர் வரி அச்சுறுத்தலைத் தொடர்ந்து, ட்ரம்புடன் தொலைபேசியில் உரையாடியதாக மார்க் கார்னி தெரிவித்துள்ளார்.
இந்தநிலையில் வட அமெரிக்க அண்டை நாடுகளுக்கு இடையிலான வர்த்தகப் பதற்றத்தைத் தணிக்கும் நோக்கில், வர்த்தகப் பேச்சுவார்த்தைகளை தீவிரப்படுத்த இரு தலைவர்களும் ஒப்புக்கொண்டுள்ளனர்.
எனினும், அமெரிக்காவின் இந்த புதிய வர்த்தக அச்சுறுத்தலுக்கு கனடா எவ்வாறு பதிலளிக்கும் என்பது குறித்து அனைத்து வழிகளும் பரிசீலனையில் உள்ளதாக மார்க் கார்னி எச்சரித்துள்ளார்.
இது தொடர்பில் மேலும் தெரிவித்த அவர், உள்நாட்டுப் பொருட்களை வாங்குவதன் மூலமும், பிற நாடுகளுடன் புதிய வர்த்தக வழிகளை அமைத்துக் கொள்வதன் மூலமும் கனடா மக்கள் உறுதியுடன் ஒன்றிணைந்து நின்றுள்ளனர்.
நாம் அனைவரும் ஒற்றுமையாக இருப்பதால் நமது நாடு மேலும் பலமடைந்துள்ளது, தொடர்ந்து ஒற்றுமையாகவும் இருப்போம்” என தெரிவித்துள்ளார்.
