பிரான்சில் மாணவர்கள் போராட்டங்கள் நகர்ப்புற வன்முறையாக முற்றியுள்ளன.

நீண்ட நேர வகுப்புகள், ஆசிரியர் பற்றாக்குறை மற்றும் சீர்கெட்ட கட்டிட வசதிகளுக்கு எதிராக தீவிரமடைந்து வரும் உயர்நிலைப் பள்ளி மாணவர்களின் போராட்டம், நகர்ப்புற வன்முறையாக முற்றியுள்ளது.

ஆசிரியர்கள் மற்றும் மாணவர்களைப் பாதுகாக்கும் பொருட்டு பல பள்ளிகள் இணையவழி வகுப்புகளுக்கு மாறும் என பிரெஞ்சு அரசாங்கம் எச்சரித்துள்ளது.

பிரதமர் செபாஸ்டியன் லெகோர்னு, வியாழக்கிழமை அன்று ஒரு அவசர அமைச்சரவைக் கூட்டத்தைக் கூட்டி, கடந்த வாரம் பாரிஸ் பிராந்தியத்தில் வெடித்து, நாடு முழுவதும் பரவிவரும் ஆர்ப்பாட்டங்களைக் கையாள்வதற்காக பயணத் திட்டங்களை ரத்து செய்யுமாறு அமைச்சர்களுக்கு அறிவுறுத்தினார்.

இந்த நிலையில், நாடு முழுவதும் உயர்நிலைப் பள்ளிகளுக்கு வெளியே சுமார் 900 ஆர்ப்பாட்டங்கள், சாலை மறியல்கள் மற்றும் அது தொடர்பான சம்பவங்கள் நடைபெற்று வந்ததாகவும், அதன் விளைவாக 160-க்கும் மேற்பட்ட பள்ளிகள் மூடப்பட்டதாகவும் காவல்துறை தெரிவித்துள்ளது.

இதனிடையே, வியாழக்கிழமையன்று, பாரிஸ் மற்றும் மார்சேய் உள்ளிட்ட சுமார் 30 பல்கலைக்கழக வளாகங்களுக்கான அணுகலும் தடுக்கப்பட்டது.

போராட்டங்கள் தொடங்கியதிலிருந்து 15 முதல் 18 வயதுக்குட்பட்ட சுமார் 3,000 உயர்நிலைப் பள்ளி மாணவர்கள் கைது செய்யப்பட்டுள்ளனர்; இதில் வியாழக்கிழமை அன்று மட்டும் 1,949 பேர் அடங்குவர் என்று உள்விவகார அமைச்சகம் தெரிவித்துள்ளது.

இதுவரை 300-க்கும் மேற்பட்ட காவல்துறையினரும், டசின் கணக்கான தீயணைப்பு வீரர்கள், ஆசிரியர்கள் மற்றும் மாணவர்களும் காயமடைந்துள்ளனர்.

மாணவர்களின் குறைகள், அதிகப்படியான பாடவேளைகள் மற்றும் நெரிசல் மிகுந்த வகுப்பறைகள் முதல், போதிய ஆசிரியர்கள் இல்லாமை மற்றும் இந்த ஆண்டின் தொடக்கத்தில் நிலவிய வெப்ப அலைகளின் போது தாங்க முடியாத வெப்பநிலை வரை பல்வேறு விடயங்களை உள்ளடக்கி இந்த போராட்டங்கள் முன்னெடுக்கப்படுகிறது.

அதிகரித்து வரும் வன்முறைப் போராட்டங்களை எதிர்கொள்ளக் கலவரத் தடுப்புப் படையினர் களமிறக்கப்பட்டுள்ளனர். காயங்கள் பெரும்பாலும் வீசப்பட்ட பொருட்களாலும், காவல்துறையினர் கலவரத்தைக் கட்டுப்படுத்தப் பயன்படுத்திய எறிகணைகளாலும் ஏற்பட்டுள்ளன.

மேலும், மூன்று மாணவர்கள் மீது பொலிசார் வரம்பு மீறிய பலத்தையும் கொடூரத்தையும் பிரயோகித்ததாகக் கூறப்பட்ட குற்றச்சாட்டுகளைத் தொடர்ந்து, காவல்துறைக்கு இடையேயான உள் விசாரணை ஒன்றை உள்விவகார அமைச்சகம் அறிவித்துள்ளது.

பல பள்ளிகளுக்கு வெளியே குப்பைத் தொட்டிகள் தீயிட்டுக் கொளுத்தப்பட்டுள்ளன; மேலும் சில கட்டிடங்களுக்குள் இன்னும் தீவிரமான தீவைப்பு முயற்சிகளும் நிகழ்ந்துள்ளதாகத் தெரிவிக்கப்பட்டுள்ளது.

வடமேற்குப் பகுதியிலுள்ள நான்ட்ஸ் (Nantes) நகரில் உள்ள ஒரு பள்ளியில் தீ வைக்கப்பட்டதால் ஏற்பட்ட சேதம் மிக அதிகமாக இருந்ததால், அப்பள்ளி ஒரு மாத காலத்திற்கு மூடப்பட்டிருக்கும் என்று அதிகாரிகள் தெரிவித்தனர்.

தெற்கு நகரமான டூலூஸில் குப்பைத் தொட்டிகள் தீக்கிரையாக்கப்பட்ட பல சம்பவங்கள் பதிவாகின; அதேவேளையில் லில்லி நகரில், கருப்பு நிற ஹூடி அணிந்திருந்த இளைஞர்கள் பேருந்து நிறுத்தம் ஒன்றைச் சேதப்படுத்தியுள்ளனர்

மார்சேய் நகரில், இரண்டு பள்ளிகளுக்குள் தீ வைப்பதற்கான முயற்சிகள் மேற்கொள்ளப்பட்டன. அவற்றில் ஒரு பள்ளியில், ஆசிரியர் ஒருவர் மீது பெட்ரோல் ஊற்றப்பட்டுள்ளது.

பல ஆசிரியர்களும் தலைமை ஆசிரியர்களும் தங்களுக்கு உடல்ரீதியான மிரட்டல்கள் விடுக்கப்பட்டதாகவும், சில சமயங்களில் தாக்கப்பட்டதாகவும் தெரிவித்துள்ள போதிலும், அவர்களில் சிலர் தங்கள் மாணவர்களுக்கு ஆதரவளிக்கின்றனர்.

இந்த நிலையில், தீவிர இடதுசாரி கட்சியான ‘லா பிரான்ஸ் இன்சோமிஸ்’ (LFI) போராட்டங்களை ஊக்குவிப்பதாக அரசாங்கம் குற்றம் சாட்டியுள்ளது; பாரிஸின் புறநகர்ப் பகுதியான செயின்ட்-டெனிஸின் LFI மேயர் பாலி பகாயோகோ உள்ளிட்ட அக்கட்சியின் பல நாடாளுமன்ற உறுப்பினர்களும் மேயர்களும் போராட்டங்களின்போது மாணவர்களை ஊக்கப்படுத்தியுள்ளதாகவே தகவல் வெளியாகியுள்ளது.